Mat 22 | TVK | STEP | Melele xa Iesu da tamu e vangit vioh te Nim Eo, xi dei vole ak mun mi moletin xil bit,

b 22:15 Tumulen ak de Mak 12:13-17; e Luk 20:20-26 mun

d 22:23 Tumulen ak de Mak 12:18-27; e Luk 20:27-40 mun

g 22:34 Tumulen ak de Mak 12:28-34; e Luk 10:25-28 mun

h 22:41 Tumulen ak de Mak 12:35-37; e Luk 20:41-44 mun

Matthew 22

Iesu Dei Vole Tei usil Suv Toto Tei xa Misilasil ni Moletin Xil tengan Lave Anien te Tetelien Tei na Natneli

1 ^aMelele xa Iesu da tamu e vangit vioh te Nim Eo, xi dei vole ak mun mi moletin xil bit, 2 “Hi xa be Suv Toto e meulien na moletin nan xil nggoni suv toto tei xa, vatei, misak mesen anien te tetelien tei na natneli. 3 Xi misil slev nan xil laba tengan lakes ngan xil xa suv toto ak tesilasil ve xil ngamu tengan limei e anien ak. E moletin xil ak labit linamei ti.

4 “Ma suv toto ak misil slev sav nan xil e biteni mi xil bit, 'Ha muhiteni mi ngan xil xa natesilasil ve xil muhit, “!Mumei! Inou nasak mesen anien xil holu ngamu. Labas buluk savan xil e sulut buluk xil mun xa lakaio kuhi be te anien ak. Reitin, holesok xil vus te anien te tetelien ak mese tuei di. Ma mutemanon mumei.”'

5 “E moletin xil ak lanem male ni raen tang, e laba sung di lapol ni polien nae xil. Tei be naho nan, e tei mun ba pol e stoa nan. 6 E moletin teisav xil ladal xat slev nan xil ak, labas purun xil e lamu vin xil. 7 E melele xa suv toto ak milongeong usili, ien mikat xa mikat. Misak ni, misil moletin te vaeen nan xil laba lamu vuol ni ngan xil xa latehas vin slev nan xil, e ladin taon nae.

8 “Di, suv toto ak biteni mi slev sav nan xil bit, 'Anien te tetelien meses tuei di. E ngan xil xa natesilasil ve xil, meulien nae tapin ti tengan lamei lava ni. 9 Ma ha muhe suse xil te taon e musilasil ni moletin xil vus xa mukamet xil tengan mei lia anien te tetelien ak.' 10 Misak ni xil labe suse xil e lakes viton moletin xil vus xa lakamet xil, ngan xil xa labos e ngan xil xa lasa. E nim xa anien te tetelien da en polu kuhi ni moletin xil.

11 “Ngan xil xa lamei e tetelien ak, lasing kuhi ni eising xil te tetelien. E melele xa suv toto bemei tengan vapus ti ngan xil xa lamei, xi miketeh e mikamet moletin tei xa tasing ni ti eising te tetelien. 12 Ma suv toto ak be visali e misisi bit, '?Tuxoli, omei e nim ak midep vari xa otasing ni ti eising te tetelien?' E moletin ak dat votei, e takil ti naha xa ihiteni.

13 “Misak ni, suv toto biles e misemaen ni moletin te polien nan xil bit, 'Muvar viton hen e len xil, e mukuvun rati ihe hale e ha ita nga e ut te maluxoluk. E rute ak moletin xil ti limuis e ti lingas luhe xil ve longpangasien nae xil.'”

14 Di, Iesu misep kor usil vole ak bit, “Reitin, Hi misilasil ve moletin xil holu tengan lamei visali, e xil vahis tang iaxa bosei xil tengan liti visali.”

Farasi Xil Lasis Iesu usil Rin te Takis

15 ^bMelele xa Farasi xil lalong vole xil xa Iesu di biteni ba xat xil, xil laba di lalang ni mesal tova xa likila lital xati ixo en ve sepinien nan. 16 Misak ni, lasil rut moletin nae xil del rut Siu sav xil mun xa ladi rin na suv toto Herod Antipas laba. Xil labe visal Iesu e labiteni mini labit, “Tisa, xamem makila xa xouk obe hisit moletin tei xa moletin sav xil lakila liling nenesien nae iti en. E makila mun xa xouk di opispisi mi moletin xil ni suse te reitinen xa Hi ien bei tengan moletin nan xil lihusili. Xouk di osepin mi moletin xil vus nggoni ngan xa xil vus lapin tang, tave ti neta xa labe eilep xil mu movotei xil tang. 17 Ma, usa ti nenemien nam mi xamem usil rin ak. ?Rae na Mosis maen ni tengan Siu xil ti lixal takis iha mi suv toto tahal Rom, mu tamaen ni ti?”

18 E Iesu pus kil nenemien tesa nae e bit rilomun ni mi xil bit, “!Xamim mubos nggo hilbemim tang! ?Veneh ma di musak pis nou? 19 Musa mani tova xa di langgal takis ni.” Melele xa lasa ni mini 20 xi misis xil bit, “?Valnao visi vari iaxa da en? ?E his visi iaxa de mani ak?” ^{▼▼22:20 Mani ak, valnao suv toto tahal Rom iaxa da en e ladis en labit, 'Ngan ak be nat Ogastas xa be Hi.'}

21 Xil labit rilomun ni mini labit, “Neta xalu vus xa ladi en be na suv toto tahal Rom.”

Ma Iesu biteni mi xil bit, “Xosxa mak, ma momal tang tengan musa naha xa be na suv toto tahal Rom mini, e naha xa be na Hi, musa ni mini.”

22 E melele xa lalong sepinien nan, latemanin pupu ni. Ma, labe relingi e laba.

Satusi Xil Lasis Iesu usil Melele xa Moletin Xil Limea Rilomun ra Maten

23 ^dE melengien xati nen tak, Satusi xil xa labit moletin misakras vamea rilomun ra maten labe visal Iesu, e lasisi labit, 24 “Tisa, Mosis tetisi tehit xosxa moletin tei imat reling atou nan e tuvava nalu tovuol, ma tuneli sung iteli itel tunau ak. Imak, ma melele lalihur horamue tei nalu, lipusi ixoni ngan xa be nat tiramue xa mat. ^e 25 Tetiamu, tua tatei xil latehe lu e he sav (7) lateti vis xamem. Ngan xa tehe muimol teteli tetel atou tei. Di, xi mat e tuvava nalu tehe tovuol. Misak ni, tuneli mei tehur tunau nan. 26 Di, sexien nen tak testal mun mi tuneli xa tetutou ni. Ma di, testal mun mi ngan xa tehe tol nen e dit ba mak tang ba vuma ... duxoh ngan xa tehe tasite e tua xil ak. 27 E dutou ni holesok xil ak, atou ak mun mat. 28 ?Misak ni, melele xa moletin xil vus limea rilomun ra maten, ngan xave e tua xil xa labe lu e he sav (7) xiak iaxa ihur atou ak ihe nan xati vengan xil vus lateteli tetela?”

29 Iesu bit rilomun ni mi xil bit, “Xamim di mule ras suse namim vengan xa mutakil kuh ti Vanuvei Eo na Hi mu xeihen nan. 30 Vengan e melele xa moletin xil limea rilomun ra maten, xil mei lixoni masxaxa xil xa ladi ut nesao, e sexien te tetelien ihe tovuol mun. 31 ?E veneh ma mutake reitin ti xa moletin xil likila limeul rilomun ra maten? ?Mutavuli ti mu naha xa Hi tesepin ni mi xamim? Vengan xi tehit, 32 'InounabeHi na Ebraham, Hi na Aesak, e Hi na Siekop.'(Eks 3:6) ?Mulonge? Xibe Hi na ngan xil xa lameul tamu ladi, e tave na ngan xil ti xa latovuol tuei.” ^{▼▼22:32 Neta sav xa Ebraham, Aesak e Siekop lattemat nousav ngamu e melele xa Hi di tehiteni sepinien ak mi Mosis, Hi tehiteni xa xi be Hi natel. Xi tenaviteni ti xa tehe Hi natel. Ma Iesu bit ngan ak pisen ni xa di latomeul tamu latodi.}

33 E melele xa vanut moletin xil xa eilep xiak lalong pispisien nan xil, xil latemanin ni.

Iesu Pispisi usil Rae Xave Iaxa Be Eilep Mak Mu Mili Sen Rae Sav Xil

34 ^gMelele xa Farasi xil lalongeong ni xa Iesu bas vin upang na Satusi xil, xil mei labe vituei e laba lapus Iesu. 35 Tei e xil xa be tisa tei te Rae na Mosis bemei tengan vasak pis Iesu ni sepinien nan xil. 36 Misak ni, xi misisi bit, “?Tisa, rae xave vari iaxa be eilep mak mu mili sen rae xil vus?”

37 E Iesu bit rilomun ni mini bit, “'Iemim ihei Iahova xa be Hi namim ixo tinemim tevi, ixo meulien tevi namim, e ixo nenemien tevi namim.'(Dut 6:5) 38 Rae ak iaxa be eilep mak mu mili sen rae sav xil. 39 E tei mun xa nggoni tang e be lu nen di biteni bit,'Eheien namim iti e moletin sav xil ixoni ngan taxa eheien namim di e xamim mun tang.'(Lev 19:18) 40 Holesok xil vus xa di e Rae xil na Mosis e Tisen xil na provet xil tetiamu di ngamu e rae xalu ak.”

Iesu Misep usil Kristo xa Hi Tehosei

41 ^hE melele xa Farasi xil ladi vituei tamu dela, Iesu misis xil sung bit, 42 “?Xamim munemi midep usil Kristo? ?Xi istal ixo vatimol na visi?”

E xil labit rilomun ni mini labit, “Xi istal ixo vatimol na suv toto Deved tetiamu.”

43 Ma Iesu biteni mi xil bit, “?Xosxa ngan ak be reitin, veneh ma Ninin na Hi tesa nenemien mi Deved tengan ikes Kristo ak ni 'Suv'? Vengan xi biteni bit,

44 'Iahova biteni mi Suv navan bit,
“Utotan inggak e riuk metu,
ituxoh melele xa niling elu nam xil e hem.”'(Sam 110:1)

45 “Suv toto Deved vari tekes Kristo ni 'Suv nan'. ?E vengan xa tata tei misakras vakes natneli ni 'suv', Kristo istal ixo vatimol na Deved itep?” ^{▼▼22:45 Reitin xa Kristo ixo vatimol na suv toto Deved, e vengan xa xi ikes Kristo ni suv, di pisen ni xa Kristo ihe eilep mak mu mili, e xos, Kristo ak teta tetiamu ni.} 46 E moletin xil lasakras lasa rilomun ni sepinien nan. Ma e melele nen ak ba, moletin xil ulixil mikan tengan lasis ti mun neta mini.